ສູນສະຖິຕິກະສິກຳ ມີໜ້າທີ່ດັ່ງນີ້:
1. ຄົ້ນຄວ້າ ແລະ ຜັນຂະຫຍາຍ ບັນດານິຕິກຳຕ່າງໆ ທີ່ພົວພັນເຖິງການປັບປຸງ ແລະ ພັດທະນາລະບົບສະຖິຕິຂອງຂະແໜງກະສິກຳ ແລະ ປ່າໄມ້ ໂດຍຫັນເປັນແຜນງານ, ໂຄງການ ແລະ ກິດຈະກຳໃນການຈັດຕັ້ງປະຕິບັດແຕ່ລະໄລຍະ;
2. ເປັນໃຈກາງປະສານງານສັງລວມຂໍ້ມູນສະຖິຕິ ຈາກທ້ອງຖິ່ນ, ຈາກຫ້ອງການ, ບັນດາກົມ, ສະຖາບັນ, ຫົວໜ່ວຍວິຊາການລະດັບສອງ ແລະ ວິເຄາະ, ວິໄຈ, ພ້ອມທັງຄຸ້ມຄອງ ແລະ ພັດທະນາລະບົບສະຖິຕິຂອງຂະແໜງການຢ່າງລວມສູນໃຫ້ສາມາດລາຍງານ, ຮັບໃຊ້ການສະຫຼຸບຕີລາຄາ, ການສ້າງແຜນການ ແລະ ມາດຕະການ ຈັດຕັ້ງປະຕິບັດແຜນ ເປັນອາທິດ, ເປັນເດືອນ, 3 ເດືອນ, 6 ເດືອນ, ປະຈຳປີ, 5 ປີ ແລະ ຄິດໄລ່ລວມຍອດຜະລິດຕະພັນພາຍໃນຂອງຂະແໜງການ;
3. ປະສານສົມທົບກັບກົມວິຊາການ ແລະ ພາກສ່ວນກ່ຽວຂ້ອງ ໃນການຕິດຕາມ, ເກັບກຳ ແລະ ສັງລວມຂໍ້ມູນ ສະຖິຕິ ເພື່ອຮັບໃຊ້ໃນການຈັດພິມວາລະສານສະຖິຕິກະສິກໍາ, ການຄິດໄລ່ລວມຍອດຜະລິດຕະພັນພາຍໃນ (GDP), ການວາງແຜນການ, ນັກຄົ້ນຄວ້າ, ນັກສຶກສາ, ອົງການຈັດຕັ້ງສາກົນ, ນັກລົງທຶນທັງພາຍໃນ ແລະ ຕ່າງປະເທດ;
4. ອອກແບບ-ວາງແຜນ ແລະ ຈັດຕັ້ງປະຕິບັດການສໍາຫຼວດສະຖິຕິແບບຕົວແທນ ໃນແຕ່ລະຫົວຂໍ້ທີ່ຂັ້ນເທິງອະ ນຸມັດ ເຊັ່ນ: ສໍາຫຼວດຕົ້ນທຶນການຜະລິດ, ສໍາຫຼວດຕີລາຄາຜະລິດຕະພາບເຂົ້າ, ສໍາຫຼວດເກັບກໍາລາຄາສິນຄ້າສໍາຫຼວດຕ່ອງໂສ້ການຜະລິດ ແລະ ການແຈກຢາຍ ແລະ ການສໍາຫຼວດອື່ນທີ່ກ່ຽວຂ້ອງກັບສະຖິຕິກະສິກໍາ ແລະ ຊົນນະບົດ ພ້ອມທັງວິເຄາະ, ວິໄຈ, ປະເມີນ, ຕິດຕາມ, ກວດກາ, ປະເມີນຜົນ ແລະ ເຜີຍແຜ່ຜົນໄດ້ຮັບ;
5. ປະສານສົມທົບກັບສູນສະຖິຕິແຫ່ງຊາດ ແລະ ພາກສ່ວນກ່ຽວຂ້ອງ ໃນການຈັດຕັ້ງປະຕິບັດການສໍາຫຼວດສະ ຖິຕິກະສິກໍາທົ່ວປະເທດ ໃນທຸກໆ 10 ປີ ພ້ອມທັງວິເຄາະ, ວິໄຈ, ຕິດຕາມ, ກວດກາ, ປະເມີນຜົນ ແລະ ນໍາສະເໜີຕໍ່ຂັ້ນເທິງ ເພື່ອຂໍທິດຊີ້ນໍາໃນການເຜີຍແຜ່ຜົນໄດ້ຮັບ;
6. ປະສານສົມທົບກັບກົມວິຊາການທີ່ກ່ຽວຂ້ອງ ແລະ ທ້ອງຖິ່ນ ໃນການສັງລວມ, ປະເມີນ ແລະ ວິເຄາະ-ວິໄຈຂໍ້ມູນຜົນຜະລິດຂອງຂະແໜງກະສິກໍາ ແລະ ປ່າໄມ້ ເພື່ອນໍາສະເໜີຕໍ່ຂັ້ນເທິງ ກ່ອນລາຍງານໃຫ້ສູນສະຖິຕິແຫ່ງຊາດ ໃນການຄິດໄລ່ລວມຍອດຜະລິດຕະພັນພາຍໃນ (GDP) ປະຈໍາ 06 ເດືອນ ແລະ ປະຈໍາປີ;
7. ສະໜອງ, ບໍລິການ, ເຜີຍແຜ່ ແລະ ແລກປ່ຽນຂໍ້ມູນສະຖິຕິກະສິກຳ, ປ່າໄມ້ ແລະ ຊົນນະບົດ ໃນຫຼາຍຮູບແບບເຊັ່ນ: ວາລະສານ ປະຈໍາປີ, 5 ປີ, 10 ປີ, 20 ປີ, 30 ປີ, 40 ປີ, ແຜ່ນພັບ, ຊີດີຣອມ, ແຜນທີ່, ບົດລາຍງານລາຄາສິນຄ້າກະສິກໍາ, ບົດລາຍງານຜົນການສໍາຫຼວດ, ເວັບໄຊ ທັງພາຍໃນ ແລະ ບັນດາປະເທດສະມາຊິກອາຊຽນ, ພາກພື້ນ ແລະ ສາກົນອື່ນໆ;
8. ບຳລຸງ, ກໍ່ສ້າງ ແລະ ຍົກລະດັບຄວາມຮູ້ພື້ນຖານທາງດ້ານສະຖິຕິ, ແນະນໍາເຕັກນິກວິທີການ ແລະ ການນໍາໃຊ້ເຄື່ອງມືທີ່ທັນສະໄໝເຂົ້າໃນການເກັບກໍາຂໍ້ມູນສະຖິຕິ ໃຫ້ແກ່ພະນັກງານສະຖິຕິ ຢູ່ຂັ້ນກະຊວງ ແລະ ທ້ອງຖິ່ນ;
9. ສະຫຼຸບ, ສັງລວມ ແລະ ລາຍງານ ການຈັດຕັ້ງປະຕິບັດວຽກງານສະຖິຕິກະສິກຳ ໄລຍະ 3 ເດືອນ, 6 ເດືອນ 9 ເດືອນ ແລະ 1 ປີ;
10. ປະຕິບັດໜ້າທີ່ອື່ນ ຕາມການຕົກລົງ ແລະ ມອບໝາຍຂອງຂັ້ນເທິງ.