ກົມແຜນການ ແລະ ການຮ່ວມມື ມີສິດດັ່ງນີ້:
1. ນໍາສະເໜີ ຮ່າງຍຸດທະສາດ, ແຜນງານ, ແຜນການຈັດຕັ້ງປະຕິບັດວາລະແຫ່ງຊາດ ຂອງຂະແໜງກະສິກໍາ ແລະ ປ່າໄມ້, ນະໂຍບາຍ, ມາດຕະການໃນການສົ່ງເສີມການຜະລິດ ພາຍໃນ ແລະ ສົ່ງອອກ ຕໍ່ກະຊວງກະສິກຳ ແລະ ປ່າໄມ້ ພິຈາລະນາອະນຸມັດ;
2. ສະເໜີຮັບເອົາການຊ່ວຍເຫຼືອທາງການ ເພື່ອການພັດທະນາ, ການອະນຸມັດລົງທຶນ, ການອອກໃບອະນຸ ຍາດດໍາເນີນທຸລະກິດ ພາຍໃນ ແລະ ຕ່າງປະເທດ, ການຄິດໄລ່ລວມຍອດຜະລິດຕະພັນພາຍໃນ ຂອງຂະ ແໜງກະສິກໍາ ແລະ ປ່າໄມ້ ຕໍ່ກະຊວງກະສິກຳ ແລະ ປ່າໄມ້ ພິຈາລະນາ;
3. ອອກແຈ້ງການ, ຄໍາແນະນໍາ, ໜັງສືສະເໜີ ເຖິງຫ້ອງການ, ບັນດາກົມ, ສະຖາບັນ ແລະ ຫົວໜ່ວຍວິຊາການລະດັບສອງ ອ້ອມຂ້າງກະຊວງ ແລະ ຂະແໜງສາຍຕັ້ງຂອງຕົນ ຢູ່ທ້ອງຖິ່ນ ເພື່ອຈັດຕັ້ງປະຕິບັດວຽກງານແຜນການ, ຮ່ວມມື, ລົງທຶນ ແລະ ສະຖິຕິ ຂອງຂະແໜງກະສິກໍາ ແລະ ປ່າໄມ້ ໃຫ້ໄດ້ຮັບຜົນສຳເລັດຕາມຄາດໝາຍທີ່ວາງໄວ້ ພ້ອມທັງກວດກາ ຕິດຕາມ ຊຸກຍູ້ການຈັດຕັ້ງປະຕິບັດໃຫ້ໄດ້ຮັບຜົນດີ;
4. ພົວພັນປະສານງານໂດຍກົງກັບ ກົມກ່ຽວຂ້ອງ ຂອງກະຊວງແຜນການ ແລະ ການລົງທຶນ, ກະຊວງການຕ່າງປະເທດ ກ່ຽວກັບວຽກງານ ແຜນການ, ຮ່ວມມື, ລົງທຶນ, ສະຖິຕິ ບົນພື້ນຖານການຕົກລົງເຫັນດີຂອງກະຊວງກະສິກຳ ແລະ ປ່າໄມ້;
5. ຊີ້ນຳ, ຄຸ້ມຄອງ ດ້ານເຕັກນິກ, ວິຊາການ ຕາມການແບ່ງຂັ້ນ, ແບ່ງຄວາມຮັບຜິດຊອບ ແລະ ແບ່ງສິດຕາມສາຍຕັ້ງ ໃນການຕົກລົງບັນຫາຢ່າງລະອຽດ, ຈະແຈ້ງ ຕາມກົດໝາຍ ແລະ ລະບຽບການ ທີ່ວາງອອກ;
6. ສະເໜີປັບປຸງກົງຈັກການຈັດຕັ້ງຂອງຕົນ ຕໍ່ກະຊວງກະສິກຳ ແລະ ປ່າໄມ້ ກ່ຽວກັບການສ້າງຕັ້ງ, ປັບປຸງ ຫຼື ຍຸບເລີກ ບັນດາກົງຈັກການຈັດຕັ້ງ ທີ່ຢູ່ໃນຄວາມຮັບຜິດຊອບຂອງກົມ ຕາມການແບ່ງຂັ້ນຄຸ້ມຄອງ, ການກໍານົດຕໍາແໜ່ງງານ ຕາມທິດກະທັດຮັດ, ເຂັ້ມແຂງ ແລະ ມີປະສິດທິພາບ;
7. ຄົ້ນຄວ້າ, ນໍາສະເໜີແຕ່ງຕັ້ງ, ບັນຈຸ-ສັບຊ້ອນ, ຈັດວາງບຸກຄະລາກອນ, ເລື່ອນຊັ້ນ-ຂັ້ນເງິນເດືອນ, ຍ້ອງຍໍຍົກຍ້າຍ, ປົດຕຳແໜ່ງ, ປະຕິບັດວິໄນຕໍ່ພະນັກງານພາຍໃນກົມ ຕາມລະບຽບການທີ່ໄດ້ກຳນົດໄວ້ ພ້ອມທັງສົ່ງເສີມບົດບາດ ຍິງ-ຊາຍ ແລະ ຄວາມກ້າວໜ້າຂອງແມ່ຍິງ ແລະ ແມ່-ເດັກ;
8. ຮຽກໂຮມພະນັກງານນຳພາ, ຄຸ້ມຄອງ ແລະ ນັກວິຊາການຂອງຕົນ ໃນການເຂົ້າຮ່ວມກອງປະຊຸມສ່ອງແສງລາຍງານປະຈຳອາທິດ, ເຂົ້າຮ່ວມງານວາງສະແດງສິນຄ້າ, ກົນຈັກ ແລະ ຕະຫຼາດນັດກະສິກຳ, ການຈັດຝຶກອົບຮົມ-ສຳມະນາວິຊາການ ແລະ ລົງເຮັດວຽກພາກສະໜາມ ຢູ່ທ້ອງຖິ່ນ-ຮາກຖານ ຕາມຄວາມຮຽກຮ້ອງຕ້ອງການຂອງໜ້າທີ່ວຽກງານ ຕາມທີ່ໄດ້ກໍານົດໃນລະບຽບການ ທີ່ກ່ຽວຂ້ອງ;
9. ຄົ້ນຄວ້າ ແລະ ປະກອບຄຳເຫັນ ກ່ຽວກັບການລົງທຶນ ພາຍໃນ ແລະ ຕ່າງປະເທດ ດ້ານກະສິກຳ, ປ່າໄມ້ ແລະ ພັດທະນາຊົນນະບົດ ບົນພື້ນຖານກົດໝາຍ ແລະ ລະບຽບການໃນແຕ່ລະໄລຍະ;
10. ຄຸ້ມຄອງ ນຳໃຊ້ງົບປະມານ ແລະ ຊັບສິນຂອງລັດ ໃຫ້ຈັດຕັ້ງປະຕິບັດພາລະບົດບາດ ໜ້າທີ່ຄວາມຮັບຜິດ ຊອບຂອງກົມ ຕາມກົດໝາຍ ແລະ ລະບຽບການ ທີ່ກຳນົດໄວ້;
11. ຈັດກອງປະຊຸມປຶກສາຫາລື ວຽກງານທີ່ກ່ຽວຂ້ອງຂອງຕົນ ເຊັ່ນ: ວຽກງານແຜນການ, ສະຖິຕິ, ຮ່ວມມື, ລົງທຶນ, ການປະມູນຈັດຊື້-ຈັດຈ້າງ ແລະ ອື່ນໆ ຂອງຂະແໜງການກະສິກຳ ແລະ ປ່າໄມ້;
12. ເຊັນສັນຍາ, ອະນຸສັນຍາ ແລະ ບົດບັນທຶກ ເອກະສານທາງການຕ່າງໆ ກ່ຽວກັບວຽກງານການຮ່ວມມື ແລະ ການລົງທຶນ ພາຍໃນ ແລະ ຕ່າງປະເທດ ກັບອົງການຈັດຕັ້ງສາກົນ, ອົງການຈັດຕັ້ງສັງຄົມ, ເຂົ້າຮ່ວມກອງປະຊຸມ ຢູ່ພາຍໃນ ແລະ ຕ່າງປະເທດ ຕາມການມອບໝາຍຂອງຂັ້ນເທິງ;
13. ລົງລາຍເຊັນເອກະສານປະກອບຄຳເຫັນວຽກງານທີ່ຕົນຮັບຜິດຊອບ ຕາມພາລະບົດບາດ ເຖິງຫ້ອງການ,ບັນດາກົມ, ສະຖາບັນ, ຫົວໜ່ວຍວິຊາການລະດັບສອງ ແລະ ພາກສ່ວນທີ່ກ່ຽວຂ້ອງ ພ້ອມທັງລົງລາຍເຊັນຢັ້ງຢືນເອກະສານຕ່າງໆ ຕາມການຕົກລົງ ແລະ ມອບໝາຍຂອງຂັ້ນເທິງ;
14. ສະຫຼຸບ, ລາຍງານ ວຽກງານຂອງຕົນ ໃຫ້ລັດຖະມົນຕີ ກະຊວງກະສິກຳ ແລະ ປ່າໄມ້ ຊາບ ແລະ ເພື່ອຊີ້ນຳ;
15. ປະຕິບັດສິດອື່ນ ຕາມທີ່ກຳນົດໄວ້ໃນນິຕິກຳອື່ນ ແລະ ການມອບໝາຍຂອງ ລັດຖະມົນຕີ, ຮອງລັດຖະ ມົນຕີ ຜູ້ຊີ້ນຳ.