ພະແນກແຜນການ

ທີ່ຕັ້ງ ແລະ ພາລະບົດບາດ

ພະແນກແຜນການ ຂຽນເປັນຕົວອັກສອນຫຍໍ້ວ່າ “ພຜກ” ແມ່ນ ພະແນກໜຶ່ງ ທີ່ສັງກັດໃນກົງຈັກການຈັດຕັ້ງ ຂອງກົມແຜນການ ແລະ ການຮ່ວມມື, ມີພາລະບົດບາດ ເປັນເສນາທິການ ໃຫ້ແກ່ກົມແຜນການ ແລະ ການຮ່ວມມື ໃນການຈັດຕັ້ງປະຕິບັດວຽກງານແຜນການ ແລະ ແຜນງົບປະມານການລົງທຶນຂອງລັດ ໃນຂະແໜງ ກະສິກຳ ແລະ ປ່າໄມ້ໃນການສະຫຼຸບ, ສັງລວມ, ຊຸກຍູ້ຕິດຕາມ ແລະ ປະເມີນຜົນການຈັດຕັ້ງປະຕິ ບັດໂຄງການພັດທະນາຊົນນະບົດ ແລະ ລຶບລ້າງຄວາມທຸກຍາກ ທີ່ຕິດພັນກັບວຽກງານ ຂອງຂະແໜງການກະສິກຳ ແລະ ປ່າໄມ້ ໃນຂອບເຂດທົ່ວປະເທດ.

ໜ້າທີ່ ແລະ ຂອບເຂດສິດ

ໜ້າທີ່

ຄົ້ນຄວ້າ ແລະ ຜັນຂະຫຍາຍ ແນວທາງນະໂຍບາຍ ຂອງພັກ ແລະ ລັດຖະບານ ດ້ານກະສິກຳ ແລະ ປ່າໄມ້ ໃຫ້ກາຍເປັນຍຸດທະສາດ, ແຜນງານ, ແຜນການ, ໂຄງການ ໃຫ້ລົງສູ່ແຂວງ, ເມືອງ ແລະ ກຸ່ມບ້ານພັດທະ ນາໃນແຕ່ລະໄລຍະ ດ້ວຍການປະສານສົມທົບ ກັບພາກສ່ວນຕ່າງໆ ທີ່ຂື້ນກັບຂະແໜງກະສິກຳ ແລະ ປ່າໄມ້ ທັງຢູ່ສູນກາງ ແລະທ້ອງຖິ່ນ, ແລະ ຂະແໜງການຕ່າງໆ ທີ່ກ່ຽວຂ້ອງ;

2. ຄົ້ນຄວ້າສ້າງແຜນການ, ດັດແກ້ແຜນການ, ກວດກາແຜນການ ແລະ ແຜນອະນຸມັດນຳໃຊ້ງົບປະມານລົງທຶນຂອງລັດ ໃນຂະແໜງກະສິກຳ ແລະ ປ່າໄມ້ ໃນແຕ່ລະໄລຍະ ເພື່ອສະເໜີຄະນະນຳກົມ ກ່ອນສະເໜີຫາຂັ້ນເທິງພິຈາລະນາອະນຸມັດຕາມຂັ້ນຕອນ;

ຄົ້ນຄວ້າ, ວິໄຈ ສະພາບການເໜັງຕີງຂອງເສດຖະກິດກະສິກຳ ແລະ ປ່າໄມ້ ເພື່ອນຳສະເໜີຕໍ່ການນຳກົມ ສະເໜີລາຍງານ ກະຊວງກະສິກຳ ແລະ ປ່າໄມ້ ພິຈາລະນາ ອອກນະໂຍບາຍ ຫຼື ມາດຕະການແກ້ໄຂ ໃຫ້ທ່ວງທັນສະພາບການ;

4. ເປັນເຈົ້າການໃນການປະສານງານກັບພາກສ່ວນກ່ຽວຂ້ອງ ເພື່ອສະຫຼຸບສັງລວມການຈັດຕັ້ງປະຕິບັດໂຄງການພັດທະນາຊົນນະບົດ ແລະ ລຶບລ້າງຄວາມທຸກຍາກ ທີ່ຕິດພັນກັບຂະແໜງກະສິກຳ ແລະ ປ່າໄມ້ ໃນຂອບເຂດທົ່ວປະເທດ;

5. ຊຸກຍູ້, ຕິດຕາມ, ສັງລວມ ການຈັດຕັ້ງປະຕິບັດແຜນການ ແລະ ແຜນງົບປະມານການລົງທຶນຂອງລັດ ໃນຂະແໜງ ກະສິກຳ ແລະ ປ່າໄມ້ ໃນແຕ່ລະໄລຍະ,ນອກຈາກນັ້ນ ຍັງມີສ່ວນຮ່ວມໃນການກວດກາ ແລະ ປະເມີນຜົນການຈັດຕັ້ງປະຕິບັດທຸກໆ ໂຄງການລົງທຶນຂອງຂະແໜງກະສິກຳ ແລະ ປ່າໄມ້;

ຄົ້ນຄວ້າ, ຜັນຂະຫຍາຍ ແລະ ສະເໜີຂໍອະນຸມັດນຳໃຊ້ບັນດານິຕິກຳ, ຂໍ້ກຳນົດ, ກົດລະບຽບ, ຫຼັກການຄຸ້ມຄອງດ້ານແຜນການ, ເຕັກນິກການສ້າງແຜນການ, ຫຼັກສູດການຝຶກອົບຮົມ ດ້ານແຜນການ ໃນການພັດທະ ນາວຽກງານແຜນການ ຂອງຂະແໜງກະສິກຳ ແລະ ປ່າໄມ້ ໃນຂອບເຂດທົ່ວປະເທດ ເພື່ອເປັນເຄື່ອງມືຮັບໃຊ້ ໃນການວາງແຜນ;
ສ້າງຄວາມອາດສາມາດ ດ້ານບຸກຄະລາກອນ ແລະ ປັບປຸງແບບແຜນວິທີເຮັດວຽກ ຂອງ ພະແນກແຜນ ການ, ພົວພັນນຳບັນດາກົມ, ສະຖາບັນ, ຂະແໜງແຜນການ ຢູ່ພະແນກກະສິກຳ ແລະ ປ່າໄມ້ ແຂວງ ແລະ ນະຄອນຫຼວງ, ໜ່ວຍງານແຜນການ ຢູ່ຫ້ອງການກະສິກຳ ແລະ ປ່າໄມ້ເມືອງ ໃຫ້ມີຄວາມຮູ້ຄວາມສາມາດ ທາງດ້ານການວາງແຜນ ເພື່ອຮອງຮັບໜ້າທີ່ການເມືອງ ໃນແຕ່ລະໄລຍະ;
ຈັດຕັ້ງປະຕິບັດແຜນງານ, ແຜນການ ແລະ ໂຄງການ ຕາມພາລະບົດບາດການເຄື່ອນໄຫວ ຂອງພະແນກແຜນການ ທີ່ໄດ້ຮັບອະນຸມັດ ແລະ ເຫັນດີຈາກການນຳຂອງກົມແຜນການ ແລະ ການຮ່ວມມືໃນແຕ່ລະໄລຍະ;
ຈັດຕັ້ງປະຕິບັດວຽກງານສະເພາະກິດ ຕາມການມອບໝາຍ ຂອງຄະນະນຳກົມແຜນການ.

ຂອບເຂດສິດ

ຄົ້ນຄວ້າ, ປະກອບຄຳເຫັນ, ກວດຜ່ານ ແລະ ດັດແກ້ແຜນການ, ໂຄງການ ແລະ ແຜນງົບປະມານ ການລົງທຶນ ຂອງລັດຂອງຫ້ອງການ, ບັນດາກົມ, ສະຖາບັນ, ຫົວໜ່ວຍວິຊາການ, ໂຄງການ ແລະ ພາກສ່ວນທີ່ກ່ຽວຂ້ອງກັບການພັດທະນາກະສິກຳ ແລະ ປ່າໄມ້ ແລະ ການພັດທະນາຊົນນະບົດກ່ອນເອົາເຂົ້າແຜນການງົບປະມານ ປະຈຳສົກປີ ແລະ ສະເໜີຂໍດັດແກ້ແຕ່ລະໄລຍະ;

2. ເກັບກຳ, ສັງລວມ ບົດສະເໜີໂຄງການ, ບົດລາຍງານການຈັດຕັ້ງປະຕິບັດແຜນການ ແລະ ແຜນງົບປະມານ ແລະ ບັນດາເອກະສານ ທີ່ກ່ຽວຂ້ອງ ຢ່າງຮອບດ້ານ ຈາກຫ້ອງການ, ບັນດາກົມ, ສະຖາບັນ, ໂຄງການອ້ອມຂ້າງ ກະຊວງກະສິກຳ ແລະ ປ່າໄມ້, ຂະແໜງແຜນການຕາມສາຍຕັ້ງຂອງພະແນກກະສິກຳ ແລະ ປ່າໄມ້ແຂວງ ແລະ ນະຄອນຫຼວງ, ຫ້ອງການ ກະສິກຳ ແລະ ປ່າໄມ້ເມືອງ ເພື່ອເປັນບ່ອນອີງ ໃນການຊຸກຍູ້, ຕິດຕາມ ແລະ ປະເມີນຜົນ ການຈັດຕັ້ງປະຕິບັດແຜນການຕົວຈິງ;

3. ຄົ້ນຄວ້າ, ວິໄຈສະພາບເສດຖະກິດກະສິກຳ, ປັບປຸງລະບົບການລາຍງານ ຖານຂໍ້ມູນຊັບພະຍາກອນກະສິກຳ ແລະ ປ່າໄມ້ ທົ່ວປະເທດ;

4. ຊຸກຍູ້, ຕິດຕາມ ແລະ ປະເມີນຜົນ ການຈັດຕັ້ງປະຕິບັດແຜນການ ແລະ ແຜນງົບປະມານ ການລົງທຶນຂອງລັດໃນຂະ ແໜງກະສິກຳ ແລະ ປ່າໄມ້ ບົນພື້ນຖານການປະສານສົມທົບກັບ ບັນດາພາກສ່ວນທີ່ກ່ຽວຂ້ອງຂັ້ນສູນກາງ, ທ້ອງ ຖິ່ນ, ພາກລັດ ແລະ ພາກສ່ວນເສດຖະກິດອື່ນໆ ໃນແຕ່ລະໄລຍະ;

ຜັນຂະຫຍາຍ ບັນດານິຕິກຳຕ່າງໆ ທີ່ກ່ຽວກັບ ການສ້າງແຜນການ ແລະ ການຕິດຕາມ ການຈັດຕັ້ງປະຕິບັດໂຄງການ, ສະເໜີອອກແຈ້ງການ, ຂໍ້ກຳນົດ ແລະ ບົດແນະນຳແບບຟອມຕ່າງໆ ກ່ຽວກັບວຽກງານແຜນການ ແລະ ການປະເມີນແຜນການໂຄງການ ເພື່ອໃຫ້ປະຕິບັດເປັນເອກະພາບພາຍໃນຂະແໜງການກະສິກຳ ແລະ ປ່າໄມ້ທົ່ວປະເທດ;

6. ປະຕິບັດ ສິດເຄື່ອນໄຫວວຽກງານອື່ນໆ ທັງພາຍໃນ ແລະ ພາຍນອກ ຕາມການຕົກລົງ ແລະ ມອບໝາຍ ຈາກຄະນະກົມ.

ໂຄງປະກອບການຈັດຕັ້ງໂຄງປະກອບກົງຈັກ

ພະແນກແຜນການ ປະກອບດ້ວຍ 3 ຂະແໜງ ດັ່ງນີ້:

1. ຂະແໜງ ວາງແຜນ ແລະ ສັງລວມ

2. ຂະແໜງ ຄຸ້ມຄອງການລົງທຶນຂອງລັດ

3. ຂະແໜງ ຕິດຕາມ ແລະ ປະເມີນຜົນ

ໂຄງປະກອບດ້ານບຸກຄະລາກອນ

ພະແນກແຜນການ ປະກອບດ້ວຍ ຫົວໜ້າພະແນກ 1 ທ່ານ, ຮອງຫົວໜ້າພະແນກ ຈຳນວນໜື່ງ, ຫົວໜ້າຂະແໜງ, ຮອງຫົວໜ້າຂະແໜງ ແລະ ຈຸງານຈຳນວນໜື່ງ ທີ່ໄດ້ຮັບການແຕ່ງຕັ້ງ, ຍົກຍ້າຍ ຫຼື ປົດຕ່ຳແໜ່ງ ຈາກລັດຖະມົນຕີວ່າການ ກະຊວງກະສິກຳ ແລະ ປ່າໄມ້ ຕາມການສະເໜີ ຂອງກົມແຜນການ ແລະ ການຮ່ວມມື ໂດຍຜ່ານກົມຈັດຕັ້ງ ແລະ ພະນັກງານ.
ພະແນກແຜນການ ປະກອບດ້ວຍພະນັກງານວິຊາການຈໍານວນໜຶ່ງ ຕາມການກໍານົດຕໍາແໜ່ງງານທີ່ຂັ້ນເທິງ ອະນຸມັດ

ໜ້າທີ່ ຂອງຂະແໜງວາງແຜນ ແລະ ສັງລວມ

1. ຄົ້ນຄວ້າ, ສັງລວມ ແລະ ຜັນຂະຫຍາຍ ທິດທາງນະໂຍບາຍຂອງພັກ ແລະ ລັດຖະບານ, ແຜນພັດທະນາເສດຖະກິດ-ສັງຄົມແຫ່ງຊາດ, ກົດໝາຍ, ດຳລັດ, ມະຕິ, ຄຳສັງ, ແຈ້ງການ, ຂໍ້ແນະນຳ, ເອກະສານສະເພາະກິດຕ່າງໆ ທີ່ເປັນເຄື່ອງມືສຳລັບການວາງແຜນໃຫ້ເຊື່ອມໂຍງປະສົມປະສານກັນໃນການຈັດຕັ້ງປະຕິບັດຕົວຈິງ ໃຫ້ໄດ້ຮັບຜົນສຳເລັດ;

2. ຄົ້ນຄວ້າ, ອອກແບບ ແລະ ຄຸ້ມຄອງລະບົບຖານຂໍ້ມູນການລາຍງານ ຄວາມຄືບໜ້າໃນການຈັດຕັ້ງປະຕິບັດແຜນພັດທະ ນາກະສິກຳ ແລະ ປ່າໄມ້ທົ່ວປະເທດ;

3. ກະກຽມ ແລະ ສ້າງເນື້ອໃນບົດສະຫຼຸບ ແລະ ແຜນການຂະແໜງກະສິກຳ ແລະ ປ່າໄມ້ ທົ່ວປະເທດ ໃນແຕ່ລະໄລຍະ ປະຈຳ 3 ເດືອນ, 6 ເດືອນ, 9 ເດືອນ, 1 ປີ, 5 ປີ, ໄລຍະຍາວ ແລະ ຕາມແຕ່ລະດູການ;

4. ປະສານງານກັບບັນດາພະແນກ, ສູນ ອ້ອມຂ້າງກົມແຜນການ ແລະການຮ່ວມມື, ບັນດາພະແນກການ ຂອງຫ້ອງການ, ບັນດາກົມ ແລະ ສະຖາບັນ, ຂະແໜງແຜນການ ພະແນກກະສິກຳ ແລະ ປ່າໄມ້ແຂວງ ແລະ ນະຄອນຫຼວງ, ໜ່ວຍງານແຜນການ ຂອງຫ້ອງການກະສິກຳ ແລະ ປ່າໄມ້ເມືອງ ໃນການຊຸກຍູ້, ຕິດຕາມ, ກວດກາ, ວິໄຈຂໍ້ມູນ, ຕີລາຄາສະພາບ ແລະ ປະເມີນຜົນການຈັດຕັ້ງປະຕິບັດແຜນການຜະລິດດ້ານກະສິກຳ ແລະ ປ່າໄມ້ ທົ່ວປະເທດໃນແຕ່ລະໄລຍະ;

ເປັນເຈົ້າການໃນການປະສານງານກັບພາກສ່ວນກ່ຽວຂ້ອງ ທັງສູນກາງ ແລະ ທ້ອງຖິ່ນ ເພື່ອສະຫຼຸບສັງລວມການຈັດຕັ້ງປະຕິບັດໂຄງການພັດທະນາຊົນນະບົດ, ວຽກງານຈຸດສຸມຂອງລັດຖະບານ, ວຽກສາມສ້າງ ເພື່ອຜະລິດສີນຄ້າ ແລະ ລຶບລ້າງຄວາມທຸກ ຍາກທີ່ຕິດພັນກັບ ຂະແໜງກະສິກຳ ແລະ ປ່າໄມ້ ໃນຂອບເຂດທົ່ວປະເທດ;
ສະຫຼຸບການເຄື່ອນໄຫວວຽກງານ ແຜນການ ຂອງພະແນກແຜນການ ປະຈຳອາທິດ, ປະຈຳ ເດືອນ, 3 ເດືອນ, 6 ເດືອນ, 9 ເດືອນ ແລະ ປະຈໍາປີ ເພື່ອປະກອບເຂົ້າໃນບົດສະຫຼຸບຂອງກົມແຜນການ ແລະ ການຮ່ວມມື;

7. ຄົ້ນຄວ້າ, ສັງລວມ, ປະສານສົມທົບ ແລະ ເຄື່ອນໄຫວວຽກງານສະເພາະກິດ ຕາມການມອບໝາຍ ຂອງຄະນະພະແນກແຜນການ ແລະ ຄະນະນຳກົມແຜນການ.

ໜ້າທີ່ ຂອງຂະແໜງ ຄຸ້ມຄອງການລົງທຶນຂອງລັດ

ຄົ້ນຄ້ວາ ຕີລາຄາປະເມີນຄວາມເປັນໄປໄດ້ ແລະ ປະສິດທິຜົນ ຂອງໂຄງການລົງທຶນຂອງລັດ ກ່ອນຈັດບູລິມະສິດສະເໜີເຂົ້າແຜນງົບປະມານແຕ່ລະສົກປີ;
ຄົ້ນຄວ້າ, ສັງລວມ, ວາງແຜນ ແລະ ດັດແກ້ແຜນງົບປະມານການລົງທຶນຂອງລັດ, ກອງທຶນຕ່າງໆ ແລະ ງົບປະມານສຸກເສີນແກ້ໄຂໄພພິບັດ ຂອງກະຊວງກະສິກຳ ແລະ ປ່າໄມ້ ບົນພື້ນຖານປະສານສົມທົບກັບພາກສ່ວນກ່ຽວຂ້ອງ ເພື່ອເຊື່ອມໂຍງແຜນການ ແລະ ແຜນງົບປະມານໃຫ້ສອດຄ່ອງ ແລະ ເໝາະສົມ ແລ້ວລາຍງານຂັ້ນເທິງຊາບ ແລະ ສະເໜີຂໍອະນຸມັດໃນແຕ່ລະໄລຍະ;

3. ຄົ້ນຄວ້າ, ສັງລວມ, ວິໄຈແຫຼ່ງທຶນຕ່າງໆ ພ້ອມທັງມີຄຳເຫັນຕໍ່ແຜນນຳໃຊ້ງົບປະມານການລົງທຶນຂອງລັດ ເພື່ອລາຍງານຄະນະນຳກົມກ່ອນນຳສະເໜີອະນຸມັດ ຈາກກະຊວງແຜນການ ແລະ ການລົງທຶນຫາກະຊວງການເງິນເບີກຈ່າຍ;

4. ປະສານງານກັບບັນດາພະແນກ, ສູນ ອ້ອມຂ້າງກົມແຜນການ, ບັນດາພະແນກການ ຂອງບັນດາກົມ ແລະ ສະຖາບັນ, ຂະແໜງແຜນການ ພະແນກກະສິກຳ ແລະ ປ່າໄມ້ແຂວງ ແລະ ນະຄອນຫຼວງ, ໜ່ວຍງານແຜນການ, ຫ້ອງການກະສິກຳ ແລະ ປ່າໄມ້ເມືອງ ເພື່ອສັງລວມ ແລະ ວິເຄາະຂໍ້ມູນການລົງທຶນຂອງລັດ ໃນແຕ່ລະໄລຍະ;

ຄົ້ນຄວ້າ, ຕິດຕາມ ແລະ ປະເມີນຜົນ ການຈັດຕັ້ງປະຕິບັດ ແຜນງົບປະມານ ການລົງທຶນຂອງລັດ, ກອງທຶນຕ່າງໆ ແລະ ງົບປະມານອະນຸມັດ ຈາກສະພາແຫ່ງຊາດ ບົນພື້ນຖານປະສານສົມທົບກັບພາກສ່ວນກ່ຽວຂ້ອງ ເພື່ອລາຍງານ ຂັ້ນເທິງມີທິດຊີ້ນຳ ໃນແຕ່ລະໄລຍະ;

6. ຄົ້ນຄວ້າ, ສັງລວມ, ປະສານສົມທົບ ແລະ ເຄື່ອນໄຫວວຽກງານສະເພາະກິດຕ່າງໆ ຕາມການມອບໝາຍ ຂອງຄະນະພະແນກແຜນການ ແລະ ຄະນະນຳກົມ.

ໜ້າທີ່ ຂອງຂະແໜງ ຕິດຕາມ ແລະ ປະເມີນຜົນ

1. ຄົ້ນຄວ້າ ຕີລາຄາປະເມີນຄວາມເປັນໄປໄດ້ແລະ ປະສິດທິຜົນ ຂອງໂຄງການລົງທຶນລັດ ຊ່ວງດໍາເນີນ ແລະ ພາຍຫຼັງການຈັດຕັ້ງປະຕິບັດໂຄງການໃນແຕ່ລະໄລຍະ;

ຊຸກຍູ້, ຕິດຕາມ, ກວດກາ ແລະ ປະເມີນຜົນການຈັດຕັ້ງປະຕິບັດ ການເຊື່ອມໂຍງແຜນການກັບບັນດາໂຄງການລົງທຶນຂອງລັດ ໃນຂະແໜງກະສິກຳ ແລະ ປ່າໄມ້ທົ່ວປະເທດ ແຕ່ລະໄລຍະ;
ຕິດຕາມ, ສັງລວມ, ຄົ້ນຄວ້າ-ອອກແບບ ກ່ຽວກັບລະບົບການຕິດຕາມ ແລະ ປະເມີນຜົນ ດ້ານກະສິກຳ ແລະ ປ່າໄມ້ ໃຫ້ເປັນລະບົບແຕ່ສູນກາງລົງສູ່ທ້ອງຖິ່ນ;
ປະສານງານກັບບັນດາພະແນກ, ສູນ ອ້ອມຂ້າງກົມແຜນການ, ບັນດາພະແນກການ ຂອງບັນດາກົມ ແລະ ສະຖາບັນ, ຂະແໜງແຜນການ ພະແນກກະສິກຳ ແລະ ປ່າໄມ້ແຂວງ ແລະ ນະຄອນຫຼວງ, ໜ່ວຍງານແຜນການ ຫ້ອງການກະສິກຳ ແລະ ປ່າໄມ້ເມືອງ ດຳເນີນວຽກງານ ຕິດຕາມ ແລະ ປະເມີນຜົນໂຄງການ ໃນແຕ່ລະໄລຍະ;

5. ເປັນເຈົ້າການໃນການປະສານງານ ແລະ ເຂົ້າຮ່ວມຊຸກຍູ້ຕິດຕາມ ແລະ ປະເມີນການຈັດຕັ້ງປະຕິບັດໂຄງການພັດທະນາຊົນນະບົດ, ວຽກງານຈຸດສຸມຂອງລັດຖະບານ, ວຽກສາມສ້າງ ເພື່ອຜະລິດເປັນສີນຄ້າ ແລະ ລຶບລ້າງຄວາມທຸກຍາກ ທີ່ຕິດພັນກັບວຽກງານ ຂອງຂະແໜງ ການກະ ສິກຳ ແລະ ປ່າໄມ້;

6. ຄຸ້ມຄອງ ແລະ ສະໜອງເອກະສານໂຄງການລົງທຶນ ຂອງລັດໃນຂະແໜງກະສິກຳ ແລະ ປ່າໄມ້, ເອກະສານຂາເຂົ້າ-ຂາອອກ ຂອງພະແນກແຜນການ, ຕິດຕາມ ແລະ ແຈກວຽກ ທີ່ໄດ້ຮັບການຊີ້ນຳຈາກຄະນະພະແນກແຜນການ ໃຫ້ແກ່ພາກສ່ວນກ່ຽວຂ້ອງ ທັງພາຍໃນ ແລະ ພາຍນອກພະແນກ;

7. ຄົ້ນຄວ້າ, ສັງລວມ, ປະສານສົມທົບ ແລະ ເຄື່ອນໄຫວວຽກງານສະເພາະກິດຕ່າງໆ ຕາມການມອບໝາຍ ຂອງຄະນະພະແນກແຜນການ ແລະ ຄະນະນຳກົມແຜນການ.

ຫຼັກການ ແລະ ແບບແຜນວິທີເຮັດວຽກ

ຫຼັກການ

ປະຕິບັດຫຼັກການລວມສູນປະຊາທິປະໄຕ, ນຳພາເປັນໝູ່ຄະນະ, ບຸກຄົນຮັບຜິດຊອບ, ສົມທົບກັບການ ປະຕິບັດລະບອບຫົວໜ້າດຽວຕາມລະບົບແບ່ງຂັ້ນຄຸ້ມຄອງ ບົນພື້ນຖານມີການແບ່ງງານກັນ ຢ່າງລະອຽດຈະແຈ້ງ ໃນໝູ່ຄະນະ ພ້ອມທັງ ມອບຄວາມຮັບຜິດຊອບ ແລະສິດໃນການຕັດສິນບັນຫາ ພາຍໃນຂອບເຂດ ຂອງແຕ່ລະຂັ້ນ.

ແບບແຜນວິທີເຮັດວຽກ

ການເຄື່ອນໄຫວວຽກງານແມ່ນປະຕິບັດຕາມລະບຽບການພາຍໃນ ຂອງກົມແຜນການ ແລະ ການຮ່ວມມື ກະຊວງກະສິກຳ ແລະ ປ່າໄມ້ ແລະ ລະບຽບວ່າດ້ວຍ ການຄຸ້ມຄອງລັດຖະກອນ, ຮັບຄຳສ່ັງ ແລະ ລາຍງານຕາມຂັ້ນ ແລະ ສາຍຊີ້ນຳ.

2.ບັນດາຂະແໜງ ທີ່ຂຶ້ນກັບພະແນກແຜນການ ມີໜ້າທີ່ຮັບຜິດຊອບ ປຸກລະດົມຊຸກຍູ້ ການຈັດຕັ້ງປະຕິບັດແຜນການ ຂອງຕົນວາງອອກໃຫ້ສຳເລັດ ແລະ ມີປະສິດທິພາບ;

ບັນດາເອກະສານ ໄດ້ຮັບການມອບໝາຍ ຂອງການນຳກົມ ໃຫ້ຄົ້ນຄວ້າ, ພາຍຫຼັງຂະແໜງ ການກ່ຽວຂ້ອງ ຫຼື ພະແນກ ປະກອບຄຳເຫັນແລ້ວ ຕ້ອງໄດ້ຜ່ານຄະນະກົມ ເຫັນດີກ່ອນນຳສະເໜີຂຶ້ນຫາການນຳກະຊວງ ພິຈາລະນາ ແລະ ໃຫ້ຄຳຊີ້ນຳ ໃນຂັ້ນຕໍ່ໄປ;
ປະສານສົມທົບ ວຽກງານແຜນການ ແລະ ວຽກງານ ທີ່ມີສ່ວນກ່ຽວພັນສະເພາະກັບຫ້ອງການກະຊວງ, ບັນດາກົມ, ສະຖາບັນ, ພະແນກກະສິກຳ ແລະ ປ່າໄມ້ແຂວງ, ນະຄອນຫຼວງວຽງຈັນ, ຫ້ອງການກະສິກຳ ແລະ ປ່າໄມ້ເມືອງ, ກຸ່ມບ້ານພັດທະນາ, ໂຮງຮຽນ, ສູນ, ສະຖານີ, ບັນດາໂຄງການ ທີ່ຂຶ້ນກັບ ແລະ ການຈັດຕັ້ງທີ່ກ່ຽວຂ້ອງ.

5. ຖືເອົາການຮ່ວມຊີວິດ, ປະຕິບັດລະບອບປະຊຸມ, ສ່ອງແສງລາຍງານ ປະຈຳອາທິດ, ສຶກສາອົບຮົມ, ຕີລາຄາການ ເຄື່ອນໄຫວ ຕາມພາລະບົດບາດ ແລະ ໜ້າທີ່ຄວາມ ຮັບຜິດຊອບ, ຄຸນສົມບັດ ແລະ ຄວາມສາມາດ ຂອງຫົວໜ້າພະແນກ ແລະ ຮອງຫົວໜ້າພະແນກ ແລະ ພະນັກງານ, ລັດຖະກອນ ເພື່ອເປັນບ່ອນອີງ ໃຫ້ແກ່ການສະເໜີປະຕິບັດນະໂຍບາຍ ຫຼື ປະຕິ ບັດວິໄນຕໍ່ພະນັກງານລັດຖະກອນ ພາຍໃນພະແນກ, ພ້ອມທັງເປັນການ ຮັບສ່ອງແສງຂໍຄຳຊີ້ນຳ ຈາກຂັ້ນ ເທິງ ລົງສູ່ພະແນກ ແລະ ສັງລວມວຽກງານຮອບດ້ານ ຂອງ ພະແນກລາຍງານໃຫ້ ການນຳກົມແຜນ ການ ມີຄຳເຫັນຊີ້ນຳ ໃນແຕ່ລະໄລຍະ.

6. ເຂົ້າຮ່ວມປະຊຸມສ່ອງແສງປະຈຳອາທິດ, ປະຈຳເດືອນ, ປະຈຳ 3 ເດືອນ, ປະຈຳ 6 ເດືອນ, 9 ເດືອນ, ປະຈຳປີ ແລະ ປະຊຸມຮອບດ້ານ ຕາມການຊີ້ນຳ ແລະມອບໝາຍຕົວຈິງ ຂອງກົມແຜນການ ເພື່ອຖອດຖອນບົດຮຽນ ການຈັດຕັ້ງປະຕິບັດ ວຽກງານຂອງພະແນກຜ່ານມາ ແລະ ວາງແຜນການເຄື່ອນໄຫວໃນຕໍ່ໜ້າໃຫ້ແທດເໝາະ.